Pamunuan

Si Mary Ann G. Bacolod ay Kawaksing Propesor sa Departamento ng Linggwistiks, UP Diliman, kung saan niya tinapos ang kaniyang mga digring BA at MA sa Linggwistiks. Mayroon siyang Ph.D. in Japanese Language and Society Studies mula sa Osaka University of Foreign Studies. Siya ay nagtuturo ng linggwistiks at wikang Hapon at Hiligaynon, at umupo sa ilang mahalagang posisyon sa loob at labas ng Unibersidad kabilang na ang pagiging Tagapangulo ng Technical Committee for Foreign Languages sa Komisyon sa Lalong Mataas na Edukasyon, Konsultant sa Wika at Kulturang Banyaga ng Bureau of Immigration Traning Division, at Tagapangulo ng UP Departamento ng Linggwistiks. Kasapi rin siya ng AsiaLex. Taglay ang interes sa pananaliksik sa Hiligaynon, aralin sa pagsasalin, leksikograpiya, sosyolinggwistiks, at wika at linggwistiks ng Hapon, siya ay nakapaglathala na ng mga artikulo at nagbasa ng papel-pangkumperensiya sa istruktura ng Filipino at hambingang pag-aaral ng Hapon at Filipino.

Si Ma. Althea T. Enriquez ay Kawaksing Propesor sa Departamento ng Filipino at Panitikan ng Pilipinas, KAL, UP Diliman. Nakapagtapos ng BA at MA sa Linggwistiks sa UP Diliman at Ph.D. in Language Studies sa National University of Singapore, siya ay nakapaglathala na ng mga artikulo hinggil sa istruktura ng wika at pagtuturo ng Filipino sa mga banyaga. Siya ay may interes sa mga pananaliksik sa gramatika, leksikograpiya, pagtuturo ng Filipino sa mga banyaga, at contact linguistics. Naging konsultant siya sa pagbuo ng materyales na panturo sa Filipino (Kagawaran ng Edukasyon), at dalawang beses na naging Visiting Lecturer para sa National Institute for Oriental Languages and Cultures sa Paris. Kasapi siya ng Pambansang Samahan sa Wika, Linguistic Society of the Philippines, at AsiaLex.